عشان نحسم الجدل الخاص بلعبة Death Stranding إن إزاي اللعبة قصة بس من غير اونلاين و في نفس الوقت ممكن العب حاجات شبه الاونلاين من غير بلايستيشن بلاس ؟
المخرج هيديو كوجيما و هو صانع ألعاب مهووس و مش حبالغ لو قلت مجنون، حب يعمل فكرة جديدة و ثورية يوحد بين اللاعبين حول العالم إللي هي لعبة قصة اوفلاين و لو في اتصال إنترنت حيبقي في حاجة كدة شبه شبكة ال Lan إللي كنا بنلعب بيها ميدل أوف هونور ف السايبر زمان
مثال
اللعبة قايمة علي توصيل ولايات أمريكا المندثرة ببعض عن طريق توصيل موارد تسمح للبشر إللي انعزلوا جميعا عن بعض بالاتحاد سوا لمواجهة مخلوقات البرزخ إللي هو المكان الواقع بين الحياة و الموت.
فدلوقتي لو أنا سايق موتوسيكل و البنزين خلص في منطقة ،ممكن لاعب تاني من غير ما نقابل بعض يكون سايب في المنطقة علبة بنزين فدة يعتبر نوع من اللعب التعاوني منغير ما شخصية اللعبة الرئيسية بتاعتي تقابل شخصية اللاعب التاني.
مثال ٢
لو عايز اعدي بين جبلين و الموارد بتاعتي حتكفي مثلا إني أقوم ببناء نص جسر ، ممكن إبني النص ، و بكرة لاعيب تاني يكمل عليه و يبقي ساعدنا بعض منغير ما نشوف بعد.
مثال ٣
لو بتواجه وحش من وحوش البرزخ و الذخيرة بتاعتك خلصت ، حتلاقي شبح شخصية رئيسية من لاعب تاني مات في المعركة دي ، بيحدفلك ذخيرة أو حاجة تساعدك تخلص المعركة دي.
هو دة المقصود باللعب التعاوني بالانترنت دون الاحتياج لبلايستيشن بلاس
و اللعبة حتكون أفضل و ايسر بكتير عند توصيل الانترنت، لأن لو اوفلاين بس مش هتلاقي النماذج المذكورة فوق و اللعبة حتبقي أصعب علي اللاعب.