أيام الجيم بوي Gameboy و الGameboy Advanced؟
طب فاكر أيام الMulti Game أو زي ما كنا بنقول الأتاري المحمول؟
كانت أيام جميله و ممتعه برغم ان الجيمنج فيها مكانش بأحسن كفاءه. و عشان الأيام دي متروحش مننا, قامت شركه أسمها شركة Panic بتصنيع جهاز جديد اسمه Playdate.
الجهاز دا يعتبر احدث جهاز للألعاب الريترو (Retro Games). و اللي مش عارف يعني ايه مصطلح ريترو, هي معناها الألعاب اللي نزلت في اواخر السبعينات و خلال فترة الثمانينات كلها. بس مش هي هي نفس الألعاب بتاعة زمان بالظبط, دي تشكيله واسعه من الألعاب و كمان العاب بتنزل موسميه مع كل تحديث update.
يعني تبقى قاعد في امان الله تلاقي لعبه جديده نازله على جهازك.
مين اللي بيعمل الألعاب بتاعة الجهاز دا؟
شوية مطورين و الشركه نفسها و أنت كمان.
أنا كمان أزاي؟
أي حد بيمتلك الجهاز يقدر يصمم و ينزل لعبه عليه بمنتهى السهوله, و دا بيتيح حريه كبيره جدا للمستخدمين انهم يلعبوا بالكيفيه اللي بيحبوها.
الجهاز صغير في كف اليد و مش بياخد مساحه و طريقة اللعب بتختلف من لعبه للتانيه. و بيجي بألوان مختلفه و Dock شبه اللي بتيجي مع الNintendo Switch بس للأسف مش بتخليك تلعب على شاشه أكبر بس بتشتغل كSpeaker.
فكرة الجهاز رائعه و تصميمه بسيط و جميل, و بيلعب على وتر الNostalgia الحساس الي اتربينا عليه في طفولتنا و أعتقد انه هينجح نجاح كويس.